កម្សាន្ត៖ តារាសំដែង និងជាតារាកំប្លែងអាមេរិក លោក Eddie Murphy នឹងទទួលបានពានរង្វាន់កិត្តិយសសមិទ្ធិផលពេញមួយជីវិត (lifetime achievement award) នៅខែក្រោយនេះ ពីកម្មវិធីប្រចាំឆ្នាំ Golden Globes។

សមាគមសារព័ត៌មានបរទេសហូលីវូដ ជាក្រុមអ្នកដែលបោះឆ្នោតជ្រើសរើសអ្នកឈ្នះក្នុងពានរង្វាន់ Global Globe បានប្រកាសថា លោក Eddie Murphy នឹងទទួលបានពានរង្វាន់ Cecil B DeMille ដើម្បីជាការអបអរសាទរការរួមចំណែករបស់លោកក្នុងវិស័យកម្សាន្ត។ 

លោក Eddie Murphy បច្ចុប្បន្នមានវ័យ ៦១ឆ្នាំគឺជាតួសម្តែងក្នុងកម្មវិធីទូរទស្សន៍ដ៏ល្បីល្បាញ Saturday Night Live និងជាតួសម្តែងក្នុងខ្សែភាពយន្តជាច្រើនរួមមាន Beverly Hills Cop, The Nutty Professor, 48 Hours និង Dreamgirls ជាដើម។ 

កន្លងមក អ្នកដែលធ្លាប់ឈ្នះពាន DeMille រួមមាន តារាសំដែង Oprah Winfrey, Meryl Streep, Sophia Loren, Tom Hanks, Jane Fonda និង Robert De Niro។

ការផ្តល់ពានរង្វាន់កិត្តិយសសម្រាប់លោក Eddie Murphy គឹជាការទាក់ទាញមួយកម្រិតទៀតសម្រាប់ការផ្សាយផ្ទាល់ព្រឹត្តិការណ៍ Golden Globes នៅថ្ងៃទី១០ ខែមករាខាងមុខ។ យ៉ាងណាមិញ គេនៅមិនទាន់មានការប្រកាសជាក់លាក់ពីបេក្ខភាពណាខ្លះដែលនឹងចូលរួមក្នុងកម្មវិធីប្រគល់ពានរង្វាន់នេះឡើយ។ 

កម្មវិធីប្រគល់ពានរង្វាន់ដ៏ធំនេះ នឹងផ្សាយផ្ទាល់ដោយទូរទស្សន៍ NBC ដ៏ល្បីល្បាញរបស់សហរដ្ឋអាមេរិក៕